Pi_Network النصابة عارف ان البوست دا ممكن يزعل الناس منى وهبقى عدو النجاح وعدو ان الناس تكسب و "تسترزق" فممكن تقروه وترموه فى الزباله عادى لو عايزين لانك انت فى النهاية سيد قرارك، قريت السطر اللى فات دا وأقريت بيه؟ يلا نبدأ

من الواضح كدا ان الاسئلة اللى على موضوع Pi Network مطلب جماهيري وشئ سيطر على عقول الناس لدرجة ان مفيش بوست من البوستات اللى بكتبها إلا وفى تعليق او رسالة مبعوته بسبب الموضوع، مبدأياً الناس اللى عمالة تكتب بوستات عن الموضوع الكل مش فاهم ابعاده ولا حتى مستقبلة رايح على فين، واللى منزل بوست هتلاقيه منزلهولك بس علشان انك تنضم ل Pi Network لمجرد انه يقنعك انك تستخدم الكود الخاص بالانضمام بتاعه لان عملية التسجيل نفسها مبتسمحش لأى شخص انه ينضم بدون ما يكون معاه "دعوه" ودا الحقيقة بيفكرنا بمخطط بونزى Ponzi Scheme او ما يعرف بالتسويق الشبكى او الهرمى وملخصه ان كل واحد يجيب واحد والاتنين يجيبوا ٤ وهكذا، حاجه تشكك فى الموضوع من بدايته، ونص الناس اللى مش فاهمه وبتقارن الموضوع بالبيتكوين حابب اقولهم وهتلاقينى بكرر النقطة دى كتير وهى ان عمر ما البيتكوين حتى من بدايته فى 2009 ما عمل حركة زى دى، يعنى ايه عملة مشفرة ملهاش حتى وجود ولا ليها اى مكافأة على استخدام طاقة التليفون فى تعدينها من حوالى ٦ شهور (تاريخ ما بدأت لحد النهارده)؟
.
الموضوع فعلا مريب لدرجة ان فى ناس كتير جداً بتفتى فيه بدون علم وناس بتقولك "اهو لو ناجح نبقى كسبنا فلوس ولو فاشل راحت علينا" وناس بررت اللى بتقوله بإنها عملة لسه جديده علشان كدا لسه بتعمل قاعدة مستخدمين وبتاع، الناس متعرفش ان من المفترض ان اى عملة مشفرة بمجرد ما تبدأ عملية تعدينها يكون فى reward او مردود لعملية التعدين دى، كل اللى شايفينه دلوقتى هوا ابلكيشن بيطلب منك تشترك وتسجل الدخول بفيسبوك (حاجه مريبة اكتر) او تسجل الدخول برقم التليفون (مريبة بردو حبتين) وكل اللى فات دا بيدعم الفرضيات اللى هتلاقوها فى اخر البوست واللى ملخصها ان كل دا بيتعارض مع التكنولوجى المحترمة المبنية عليها العملات الرقمية المشفره الحاليه!
.
الهاله اللى عماله كل مالها بتكبر حوالين الموضوع دا تشكك جدا فيه، عمله لا ليها مردود لاكتشافها او تعدينها، ٦ شهور عدت عليها بدون اى تغيير، كل اللى الناس تعرفه هيا المعلومات المتواجده على موقعهم الاليكترونى وان اللى عاملها ناس معاها دكتوراه من جامعه مرموقة زى ستانفورد (دا اصلا ميأكدش ولا ينفى اى حاجه ولا حتى نعرف مين بيدعمهم)، الموضوع فعلا مريب وغريب على كل المستويات ودا كان على مستوى المعطيات اللى معانا فى الوقت الحالى.
.
طيب على المستوى التقنى؟ تطبيق Pi Network على نظام الاندرويد بيطلب صلاحيات كتيره وطبعا لكل منها هتلاقى له تبريره الخاص قمت رحت اشوف التطبيق على جوجل بلاى لقيته بيطلب صلاحيات كتيره ودا رداً على الناس اللى كاتبه بوستات بتقول فيها ان التطبيق مبيطلبش "اى صلاحيات"، انا مش فاهم لو الابلكيشن بيطلب الصلاحيات دى فاضل ايه تانى فى الجهاز مطلبش صلاحية للوصول ليه اصلا؟
.
*دى الصلاحيات مترجمة للغة العربية وللعلم دى ترجمة جوجل للصلاحيات اللى بيطلبها التطبيق علشان محدش يقول انى ترجمتها بنفسى وجودت فيها)*
.
"يمكن لهذا التطبيق الدخول إلى:
١. جهات الاتصال
- قراءة جهات الاتصال الخاصة بك
٢. صور / وسائط / ملفات
- قراءة محتويات وحدة تخزين USB الخاصة بك
- تعديل أو حذف محتويات وحدة تخزين USB الخاصة بك
٣. هاتف
قراءة حالة وهوية الهاتف
٤. معرف الجهاز ومعلومات المكالمة
- قراءة حالة وهوية الهاتف
٥. معلومات اتصال Wi-Fi
- عرض اتصالات Wi-Fi
٦. تخزين
- قراءة محتويات وحدة تخزين USB الخاصة بك
- تعديل أو حذف محتويات وحدة تخزين USB الخاصة بك
٧. آخر
- تلقي البيانات من الإنترنت
- عرض اتصالات الشبكة
- الوصول الكامل إلى الشبكة
- منع الجهاز من النوم
- تشغيل عند بدء التشغيل
- ارسم فوق التطبيقات الأخرى
- التحكم في الاهتزاز"
.
لينك التطبيق هنا: https://play.google.com/store/apps/details?id=com.blockchainvault تقدر تفتحه على الكمبيوتر عندك وتضغط على جزء الصلاحيات او Permissions علشان تتأكد، حتى وإن كان التطبيق مطلبش الصلاحيات دى على التليفون فدا معناه انه واخد بيها Approve من فريق جوجل من اول اصدار علشان لو قام بإصدار تحديث التطبيق بعد كدا وطلب صلاحيات من الموجودين فى جوجل بلاى ومش موجوده فى التطبيق من الاول ميحتاجش انه يبرر لجوجل هوا ليه طالبها!
.
على سبيل المثال لا الحصر: صلاحية "الرسم فوق التطبيقات الاخرى" دى لوحدها مصيبه فى اندرويد وياما اتسرقت بيها بيانات من تطبيقات بنوك بس طالما دا تطبيق لسه محدش عارف هدفه ايه فمن الذكاء انها ميظهرش نواياه من البداية كدا، مش اللى هوا حرامى مبتدئ ويقوم سارق بنك مركزى مرة واحده (التشبيه لمجرد التشبيه لا علاقه له بالتطبيق)!
.
طيب هييجى اللى يقول "انا دلوقتى مش هخسر
حاجه انزل التطبيق عادى واشغله زى ما بيقولوا و .....،" بص ياسيدى، التطبيق طالما نزل على تليفونك وطلب منك بيانات زى رقم تليفونك او اذن الوصول لحساب فيسبوك الخاص بيك وانت اديتهمله طواعية (على الاغلب الكل عمل كدا) فدا لوحده خساره لانه جمع بياناتك وضافها لقاعدة مستخدمية الكتيره جدا، طيب هتقولى ماهو الكل بيعمل كدا وفيسبوك اللى انت كاتب البوست عليه بيجمع بيانات وجوجل وغيرها، دا صحيح، بس دول هدفهم واضح وصريح، انا عندى يطلع الحرامى ويقول انا حرامى افضل من انه يلف ويدور، انت هتتمتع بالمنتج بس هتوافق انى اجمع البيانات دى عنك واظهرلك اعلانات بناء عليها او هقوم بتمكين طرف تالت انه يستفيد منها ودا هدف فيسبوك وجوجل وغيرهم انما الابلكيشن بتاع Pi Network بقى بياخد كل دا ومقابل دا هيديلك ايه؟ هواء، وعود واهيه، يقنعك بفكرة انك "بكره هتكسب"، مفيش اى حاجه اكيده، كل اللى دخل واشترك بيفيد بس الشخص اللى اعلى منه اللى اداله الكود بتاع الدعوه بتاعة الاشتراك، وحتى اللى اعلى منه ميعرفش حاجه عن الخدمة، والاعلى والاعلى كذلك لحد ما توصل للى زرع الفكرة نفسها هوا بس وكام مستوى تحته اللى يعرفوا الليلة هترسى على ايه بالبلدى كدا.
.
علشان اطمنكم، انا مش خبير مالى ولا خبير فى العملات المشفره نفسها بس اعرف كتير جدا عن العملات المشفره ومستثمر من دخلى في المضمون منها زى بيتكوين وايثيريم وغيرهم، بغامر، وبعمل مضاربات، اعرف التكنولوجيا المبنية عليها العملات المشفرة من الناحية التقنية بحكم شغلى، اعرف الثغرات الموجودة فيها وعلى علم بكل الاخبار الخاصة بالتسريبات والاختراقات اللى بتحصل لمنصات تداولها، انما Pi Network كدا بمجرد نظرتى الاولى ليها اعتبرتها شبكة كبيرة من النصب (لحد دلوقتى)، اه دا مش ظاهر حالياً ولا حد يقدر يأكده لانهم اساسا مشتغلوش ولا عملوا حاجه انما طريقة الاشتراك، ونظام الدعوات الحصرى، وموضوع انها ليها ٦ شهور الناس بتعدن وبتستخدم تطبيقها ومفيش اى مكافأه يخلي اى شخص حتى لو معندهوش خبرة مسبقه يقول انها "شبكة نصب من التسويق الهرمى"، انما الناس مش عايزه تشوف حاجه زى دى واللى شايفين انهم "مش هيخسروا حاجه لو جربوا" واللى بيتعلق بقشاية علشان يكسب اى حاجه مش هياخدوا اى موقف وهيكملوا عادى جدا ولا هيفرق معاهم كلامى ولا كلامك ولا كلام اى حد.
.
لازم تاخد بالك من حاجه مهمه وتحطها حلقة فى ودنك ان عمر ما فى حد كسب من "العدم" الا الحرامية والنصابين، Pi Network هنا انا كمحمد مش شايف غير انها شئ مريب جايز يكونله مستقبل بس لما الحاضر بتاعه يبقى بالمنظر دا انا مش واثق فى مستقبله الحقيقة، ومن تانى الشخص اللى مش فاهم حاجه اللى بيقولك ان البيتكون والايثيريم بدأوا كدا دا كداب، البيتكوين من يوم ما بدأت وكان فى reward حتى وان كانت بدأت مابين عشاق الالعاب على انها نقاط ملهاش اى قيمة الا انها مقالتش ياجماعه يلا نبدأ ونجمع ناس وداتا وكل واحد يدى التانى كود علشان ينضم وهات رقم تليفونك وبياناتك وحسابك على فيسبوك ومش عارف ايه، لا دا محصلش!
.
.
طيب، وبما انى انا قولت انى مش متخصص فى الجزئية دى فسألت حد من المتخصصين اللى ليهم اكتر من ٢٠ سنة فى مجال ال Cryptography والعملات المشفرة من منطلق "فاسألوا اهل الذكر إن كنتم لا تعلمون" وكانت الاجابة بتتخلص فى النقاط التالية علشان مطولش عليهم ولا عليكم كتير:
- الموضوع دا شبه نصب
- الهدف الاساسى من وراه جمع بيانات فى مراحل مبكرة
- انعدام الرؤية والوعود الواهيه بيخليه مشروع واعد وخطر فى نفس الوقت
- تسويق هرمى بس بشكل جديد
- اى عملة مشغرة لازم يكونلها قيمة ورائها، التكنولوجيا نفسها المبنى عليها العملات الرقمية المشفرة لازم يكون عليها عرض وطلب.
- سبوبه وبتظهر فى اوقات معينه، شبكة Pi Network دى حاجه من الحاجات اللى بتنشط فى الركود الاقتصادى وبيصبح عليها تريند (لاحظ الاختلاف قولنا "بتنشط" مش "وليده" لانها اصلا موجوده من قبل ازمة كورونا) اشمعنا Pi Network اصبحت موجوده دلوقتى؟ وفى الوقت دا؟ وفى الوطن العربى؟ الموضوع مش نظرية مؤامره لان عند الاجانب الموضوع كان معروف من فتره وناس منهم كانت بتردد نفس الكلام اللى بيقوله العرب دلوقتى اللى من نوعية "نستنى ياجماعه" و "دى هتبقى شئ فى المستقبل" والخ الخ، طيب اهو عدت ٦ شهور من وقت ما تم اطلاقها وفى النهاية ايه اللى حصل؟ الناس مكملين اهو فى الولا حاجه وجايز انهم هينتهوا فى الولا حاجه بردو!
.
.
.
الخلاصة والجزء الاهم فى البوست:
انا مش عايز عدم تخصصى فى العملات الرقمية المشفرة نفسها يسيطر على توجه اى حد إلا ان كل التحليل اللى فات دا مبنى على الوضع الراهن، محدش يعرف ايه اللى ممكن يحصل فى المستقبل، ممكن العملة دى تبقى فعلا عملة تضاهى البيتكوين؟ اشك، هل ممكن ناس تندم على انها مشاركتش فيها من البداية؟ يجوز، هل ممكن تنجح؟ محتمل، هل الموضوع ممكن يطلع نصبايه؟ يجوز. البوست اتكتب بس علشان يصحح مفاهيم عماله بتلف مواقعالتواصلل الاجتماعى فقط لإقناع الناس انها تسجل علشان اللى بيقنعك يستفيد، مشوفتش حد كاتب بوست من البوستات عنها الا وفى النهاية بيقولك خد اللينك بتاعى او دعوتى وادخل جرب بيها، مفيش حد كتب بوست لله فى لله كدا الا وورا البوست مصلحه زى ما كان بيحصل وصاحبك بتاع التسويق الشبكى يفضل يزن على دماغ اهلك علشان يقنعك، اللى بيحصل دلوقتى شبيه جدا بدا!
.
.
تفاصيل Pi Network الفنية والتقنية معمولة بإتقان لدرجة انك لو قريت المستندات الفنية (ال Technical documentation) بتاعتها هتقول ايه الشغل الجامد دا، ليها nodes وليها حاجات كتيرة جدا بتتشابه وبتشترك فيها مع معظم البنية التحتية للعملات الرقمية بس دا ميعنيش اى شئ بسبب حاجه مهمه لازم تاخد بالك منها ان بيتكوين وايثيريم مفتوحين المصدر بمعنى ان اى حد يقدر يعرف اى حاجه فيهم طبعا الا هوية الاشخاص لانها مصممه من البداية انها تكون عملة امنه وبتحافظ على الخصوصية اما Pi Network دى مغلقة المصدر محدش يعرف ايه اللى بيحصل خلف الكواليس، هما بس يعرفوا عنك كل حاجه بمعنى اصح انت جوا الشبكة دى بتصبح "تاجر عملة معروف الهوية" دا ان صح التعبير وسميناها "عملة" اصلا لان لحد دلوقتى هيا ولا حاجه، اه صحيح وموضوع انها "اول عملة رقمية يمكنك تعدينها على تليفونك" اللى الكل عمال يقولها حتى اللى انشأوها دى كدبه، كان فى قبل كدا عملة اسمها Monero كنت تقدر تعدنها على اى حاجه، حطها على مكنة القهوه المتصله بالانترنت بتاعتك حضرتك وهتعدنها عادى جدا!
.
.

الخناق على العملة دى مازال مستمر على الانترنت وحتى وسط المستخدمين الاجانب واحنا العرب مش استثناء، خد بالك واعرف انت بتعمل ايه كويس لاننا فى اوقات حرجة اى مكسب فيها حتى لو وهمى بنتعلق بيه وكأنه الشئ اللى هينقذنا!
.
.
للأسف انا مرضيتش احط اى لينكات علشان كلهم فيهم نفس قصة "كود الدعوة" الحصرى دا، خد البوست بحبة ملح (يعنى متتأكدش من شئ وشك فى كل اللى موجود فيه ودور ورايا) ولحد اشعار اخر!
.
تحديثات مستمره:
١. ناس قالت ان دا مسمهوش "تعدين" اصلا، طيب روحوا قولولهم هما بقى اللى مسميين موقعهم MinePi، طبعا عارفين Mine معناها ايه؟ ولا هما بيضللوا الناس؟
٢. الاذونات اللى طالبها التطبيق مفهاش كل اللى انت كاتبه فوق دا: بالظبط، تفسير دا كالتالى: الصلاحيات اللى واخد بيها موافقه من جوجل هى اكبر من كدا وتقدر تعرفها هنا:
https://play.google.com/store/apps/details?id=com.blockchainvault&hl=en_US
دا معناه ايه؟ انه دلوقتى مش عايز غير الكونتاكتس وحبه تانيين انما بعدين بحته تحديث صغير هياخد من اللى موجودين فى اللينك، انصحك تراجع معلوماتك من تانى يا محمد علشان متكونش سبب فى تضليل اى شخص.
٣. مبدأ الحصول على اى عملة هو المكافأه، هنا فين العمله وفين المكافأه اصلا؟ اسئلة بدائية وبالرغم من بدائيتها الا انها ملهاش اجابه (فى الوقت الحالى)!
٤. الكلام اللى فات دا كله ملهوش لازمه وعايز تجرب؟ جرب على موبايل ميكونش عليه اى بيانات شخصية ليك وان طلب الامر اشتريله SIM card مخصوص للتسجيل، بياناتك اهم من عملة وهمية محدش عارف ان كنت هتاخدها من عدمه اساساً!

منقول  Mohamed A. Basset