أماكن تزورها بأقل من ٢٠ جنية

ناس كتير بتشتكي من ان الخروجات بقت غالية جدا ومكلفة، وان اقل خروجة بقي الواحد

مش بيصرف فيها اقل من ١٠٠-٢٠٠ جنيه ونرجع بقي بعدها نعيط علي المرتب اللي طار او المصروف اللي اتبخر
عشان كده جمعنالكم ١٠ أماكن هتتبسط جدا فيهم سواء لوحدك، مع صحابك او مع العيلة، هتقضي يوم حلو وهتتصور
صور تجنن ومش هتصرف اكتر من ٢٠ جنية في كل مكان منهم

 الأهرامات

ايه احلي من انك تخرج جوه التاريخ
خروجة الاهرامات مختلفة عن أي مكان تاني، هتتصور صور  حلوة جدا ومبتكرة
وانت وراك الاهرامات وأبو الهول، ده غير انك هتستمتع بركوب الخيل او الجمال
وطبعا ماتفوتش عرض الصوت والضوء في اخر اليوم

..

المتحف المصري

من اكبر متاحف العالم واللي مليان اثار وتحف مبهرة، فسحة شيقة جدا للناس
اللي مهتمة بالتاريخ وحواديت اجدادنا الفراعنة ده غير طبعا الصور الجميلة اللي هتتصورها هناك 

..

متحف الفن الإسلامي

المتحف ده بيضم مجموعة كبيرة من فنون الإسلام المختلفة، من معظم دول العالم
زي شمال أفريقيا، مصر، الأندلس، الصين، إيران
وماتنساش تتفرج علي قميص المأمون اللي ظهر في فيلم الفيل الأزرق

..

حديقة الأزهر

المساحات الخضرا والحدائق  هتخليك مش عايز تمشي من هناك، منظر الشجر ونافورات المياة
هيخلوك عايز تروح هناك كل أسبوع  وتستمتع بأحلي خروجة انت وعيلتك او صحابك وسط جمال الطبيعة

..

قلعة صلاح الدين

بسبب موقعها المتميز والمتاحف اللي فيها،  قلعة صلاح الدين واحدة من أهم المناطق السياحية في القاهرة
القلعة فيها ٤ متاحف: متحف قصر الجوهرة / متحف النقل/ المتحف العسكري المصري / متحف الشرطة المصرية 

..

بانوراما حرب أكتوبر

تجربة جميلة ومهمة لكل شخص حابب يعرف اسرته او أولاده عن انتصارنا في حرب أكتوبر كأنه عاش الاحداث بتفاصيلها
المكان بيضم قاعتين، الاولي فيها نماذج للأسلحة اللي تم استخدامها في الحرب
والقاعة التانية اللي فيها عرض ملحمة العبور بمؤثرات صوتية وموسيقي تخليك تعيش الاحداث 

..

مسجد عمرو بن العاص

“لقبه “تاج الجوامع

من اهم المزارات الإسلامية في القاهرة، ويعتبر اول مسجد اتبني في مصر بعد مافتحها عمرو بن العاص
تفاصيل المسجد هيخليك تبقي عايز فعلا تصوره من كل جوانبه وتستمتع بهيكله المميز والعريق

..

الكنيسة المعلقة

الكنيسة المعلقة تعتبر واحدة من اهم المزارات السياحية والمواقع الدينية المسيحية في مصر
مكان ليه قيمة تاريخية كبيرة ده غير انها من اقدم الكنايس واللي تم انشائها
مابين اخر القرن الرابع وأول القرن الخامس الميلادي وطبعا ماتنساش تزور
كنيسة ماري جرجس اللي في نفس الشارع واستمتع بالعظمة والجمال

..

شارع المعز

من اجمل واهم الشوارع اللي مليانة بالأثار الإسلامية، هتقضي يوم كامل بتتجول في من بيت السحيمي لوكالة الغوري
وطبعا هتعدي علي بيت زينب خاتون واللي يعتبر من اهم المواقع الاثرية التابعة لمنظمة اليونيسكو
وماتنساش وانت هناك تعدي علي المدرسة الصالحية، متحف النسيج المصري وجامع الحاكم بأمر الله واتصور احلي صور

..

الحديقة اليابانية

مكان عمره اكتر من ١٠٠ سنة، هتحس وانت هناك كأنك سافرت اسيا
المناظر الطبيعية والبحيرات اللي هناك هيخلوك تقضي يوم كامل وسط الطبيعة وطبعا هتتصور
صور تجنن جنب التماثيل الاسيوية اللي هتبقي مبهور بشكلها 

………..

القاهرة مليانة بأماكن كتيرة تقدر تتفسح فيها بمبلغ بسيط غير الأماكن دي زي

متحف جاير اندرسون، حديقة الاندلس، جزيرة المعادي، المتحف الجيولوجي المصري”
دير القديس سمعان الخراز، حديقة الأسماك، القناطر الخيرية” وغيرهم كتير
..بنوعدك انك هتستمتع بكل مكان من دول وهتعيش تجربة جديدة في كل مكان